Inanunsyo ng Philippine Health Insurance Corporation (PhilHealth) nitong Huwebes, Marso 6, 2025, na ire-reprocess na nito ang 1.1 million denied claims o nagkakahalaga ng tinatayang P8.8 billion.
Ayon sa ahensya layunin ng hakbang na ito na linisin ang backlog na dulot ng mga huling pag-file ng mga ospital at tiyakin ang agarang pagbabayad para sa mga healthcare provider.
Dagdag pa ng PhilHealth, ang hakbang na ito ay upang bawasan ang mga pasanin sa ahensya at tiyakin na matatanggap ng mga healthcare provider ang tamang bayad para sa kanilang mga serbisyo.
Sa isang pulong balitaan sa Central Office ng ahensya sa Pasig, ipinaliwanag naman ni PhilHealth President at CEO Dr. Edwin Mercado na ang mga denied claims ay dahil aniya sa mga problema na kinahaharap ng ahensya at hindi para linlangin ang mga healthcare providers.
Ibinida rin ng PhilHealth chief na ang reprocessing ng claims ay madudulot ng pagpapabuti ng access sa healthcare at magpapadali ng mga bureaucratic procedures para sa mga ospital at pasyente.
Samantala noong 2018 hanggang 2024, iniulat ng PhilHealth na 30% ng lahat ng denied claims ay dahil sa huling pagsusumite ng mga providers.
Na siyang naging epekto sa mga denied claims ng mga ito ngunit tiniyak ni Mercado na ire-reconsider ng PhilHealth ang mga claims na ito upang matiyak na matatanggap ng mga healthcare provider ang tamang kabayaran.
Ayon sa bagong polisiya na inilathala noong Huwebes, Marso 6, binigyan ang mga ospital at iba pang mga health facility ng anim na buwan mula sa bisa ng Circular upang muling isumite ang kanilang mga denied claims na tinanggihan noong ng PhilHealth.
Binigyang diin ng PhilHealth na ang mga claims na isinubmit sa kanila noong Enero 1, 2018, hanggang Disyembre 31, 2024, na hindi in-apela o nireklamo ngunit nasa pag-aari pa ng mga healthcare provider ay kasama na para sa reprocessing.
Kasama rin sa mga irereconsider ang mga claims na nasa pag-aari ng PhilHealth Regional Office Benefit Administration Sections, mga claims na nasa ilalim ng administrative protest sa PhilHealth Regional Office – Claims Review Committee, o mga in-apela sa Protest and Appeals Review Department.
Habang ang ibang mga nasabing nag apela ng kanilang denied claims na isinumite sa mga regular courts ay ire-reprocess din, basta’t bawiin ng mga nag-apela aniya ang kanilang petisyon laban sa PhilHealth.
Kung kaya’t pinaalalahanan ni Dr. Mercado ang mga ospital tungkol sa kahalagahan ng maagap na pagsusumite ng mga claims upang matiyak ang agarang pagbabayad.
