Ibinahagi ng Philippine Health Insurance Corporation (PhilHealth) na nakapagbayad na ito ng kabuuang P66.3 bilyong halaga ng mga claim para sa mga pasyente ng COVID-19.
Ayon kay Philippine Health Insurance Corporation o PhilHealth acting vice president for corporate affairs Rey Baleña, mula Enero 2020 hanggang Pebrero 2023, nagbayad na ang naturang korporasyon ng kabuuang P66.3 bilyon para sa mga claim sa COVID-19.
Idinagdag niya na kabilang dito ang COVID-19 test, isolation, at pagpapaospital ng mga pasyente.
Sinasaklaw ng state health insurer ang mga pagpapaospital ng mga pasyente ng COVID-19 depende sa kalubhaan ng pneumonia, mula P43,997 hanggang P786,384.
Sinasaklaw din ng korporasyon ang hanggang P22,449 para sa community isolation at hanggang P5,917 para sa home isolation.
Dagdag pa ni Baleña na ang PhilHealth ay mayroong P224 bilyong reserbang pondo noong Setyembre 2022.
Mayroon din itong P394 billion sa kabuuang asset, P355 billion investment portfolio, at P46 billion para sa net income.
Ipinakita ng isang pag-aaral na ang national average ng financial coverage sa ilalim nito ay nasa 65.89%.
Ang mga mahihirap na miyembro ay karaniwang tumatanggap ng 79.48% coverage, na siyang pinakamataas na saklaw sa mga sektor ng membership.
Kasunod nito ang mga sponsored members na may 78.80%, self-earning members na may 68.40%, senior citizens na may 57.91%, pormal na miyembro mula sa private at government sector na may 55.53%, at lifetime members na may 50.39%.
Inihayag din ng opisyal ng PhilHealth na magsisimula silang mag-alok ng mga outpatient package para sa mga serbisyo sa mental health ngayong taon, at nakatakda nilang ilabas ang mga alituntunin nito sa lalong madaling panahon.
Una na rito, layunin din nito na mapabuti ang outpatient therapeutic care para sa acute malnutrition para sa mga batang wala pang limang taong gulang, COVID-19 benefits package, at ang consultation benefit package para sa mga pasyente ng Pilipinas.
