CENTRAL MINDANAO-Personal na sinaksihan ni Kabacan Cotabato Mayor Evangeline Pascua-Guzman ang pagbubukas ng pinakaunang Dialysis Center sa bayan.
Ang Avitus Dialysis Center ay matatagpuan sa National Highway Purok 3, Brgy. Katidtuan corner Brgy. Dagupan Road.
Sa mensahe ni Mayor Gelyn, sa pagbubukas ng nasabing pasilidad ay magbubukas din ito ng maraming opurtunidad ganoon din sa programa mismo ng lokal na pamahalaan na UnladKabacan:SagipBuhay Program na naglalayong makatulong sa mga pasyenteng sumasailalim sa dialysis.
Matatandaang halos isang daang Kabakeño na ang natutulungan ng nasabing programa kung kaya’t sa pagbubukas ng nasabing center ay magbubukas ito ng opurtunidad na mas marami pa ang matulungan ng LGU.
Nagpasalamat din ito sa mga nasa likod ng nasabing center na napili ang bayan upang tayuan ng isang center na nakatutok sa kalusugan.
