LEGAZPI CITY – Nakahada na ang Ligao City Police Station sa ilalatag ang security plan para sa nakatakdang pagbisita ng mga Miss Earth candidates sa lungsod.
Ayon kay Police Lt. Col. Joseph Bagsao, hepe ng Ligao City PNP sa panayam ng Bombo Radyo Legazpi, humingi rin sila ng augmentation support sa Albay Police Provincial Office upang magkaroon ng dagdag na pwersa sa pagtiyak ng kaligtasan ng mga kandidata.
Napag-alamang nasa 24 na mga kandidata ng Miss earth ang bibista sa lungsod sa Nobyembre 21 hasta 22.
Pagbabahagi pa ng hepe na pinag-aralang mabuti ng PNP ang ipapatupad na seguridad sa bawat kandidata lalo pa’t karamihan sa mga ito ay mula pa sa iba’t-ibang bansa.
Target aniya ng kapulisan na matiyak na magiging maayos at matagumpay ang pagbisita ng mga kandidata sa lugar upang makita ng mga ito ang ganda ng Ligao City.
Samantala, maliban sa naturang aktibidad nakabantay din ngayon ang kapulisan sa preparasyon sa nalalapit na holiday season.
