BACOLOD CITY – Nagsasagawa na ng hot pursuit operation ang San Carlos City Police Station kasunod ng pagpatay sa provincial consultant on hospital operations ng Negros Occidental sa Emerald Arcade, Barangay Palampas, San Carlos City, Negros Occidental kagabi.
Ayon kay P/Lt. Roby Aurita, deputy station commander ng San Carlos City Police Station, sa insiyal na imbestigasyon ay napag-alaman na lumabas ang biktimang nagngangalang Marton Cui sa kanyang opisina at sasakay na sana sa kanyang sasakyan kasama ang dalawang bodyguard nang maganap ang insidente.
Narinig na lamang ng mga bodyguard ang biglang pag-aray ng biktima at doon na nakita na mayroon na itong tama ng bala sa dibdib.
Ayon kay Aurita, walang narinig na putok ng baril ang mga bodyguard kaya pinaniniwalaan na gumamit ng sniper at silencer ang suspek.
Sa ngayon ay inaalam pa ang identity kung sino at kung ilan ang may gawa ng krimen.
Naisugod pa agad sa San Carlos City Hospital ang biktimang bandang alas-8:05 ng gabi, ngunit idineklarang dead on arrival.
Napag-alaman na may mga closed circuit television camera sa pinangyarihan ng krimen, na nire-review na ng kapulisan.
