LEGAZPI CITY – Viral ngayon sa social media ang video ng isang pulis sa Sorsogon na nagpaanak ng isang ina sa loob ng traysikel.
Sa panayam ng Bombo Radyo Legazpi sa viral na pulis na si PSSgt. Gadwhin Lladones, papunta na sana sa Sorsogon Provincial Hospital sakay ng traysikel ang ina na nakilala lang sa apelyido nitong Bandola, ng makaramdam na manganganak na.
Dahil dito, humingi na ng tulong sa estasyon ng pulis ang asawa ng babae na agad naman na nirespondehan ni Lladones at kasamahan nitong pulis.
Mismong sa traysikel na isinagawa ang pagpapaanak sa ina na nagtagal rin ng ilang minuto hanggang sa mailabas ang isang malusog na sanggol na lalaki.
Nabatid na dati ng nagtatrabaho bilang nurse si Lladones bago pumasok sa pagpu-pulis kung kaya may karanasan na sa pagpapaanak.
Sa ngayon, may ilang libong views na ang naturang video na patuloy na nakakatanggap ng positibong komento mula sa mga netizens.
