Nalusutan ng Rain or Shine Elasto Painters ang defending champion na San Miguel Beermen 107-93 sa nagpapatuloy na PBA 49th Season Commissioner’s Cup na ginanap sa Filoil EcoOli Center sa lungsod ng San Juan.
Umarangkada ang Elasto Painters 12-0 sa kalagitnaan ng last quarter para maitala ang pangalawang sunod na panalo.
Sinabi ni Rain or Shine coach Yeng Guiao, na talagang pinilit niya ang kaniyang mga manlalaro na tapatan ng bilis ang Beermen para sila ay manalo.
Nanguna sa panalo ng Painters ang import na si Deon Thompson na nagtala ng 18 points habang mayroong 15 points, apat na rebounds, limang assists at apat na steals si Adrian Nocum.
Nagdagdag naman ng 14 points si Caelan Tiongson at tig-12 points sina Felix Lemetti at Keith Datu.
Nasayang naman ang nagawang 20 points at 10 rebounds ni June Mar Fajardo at 16 points ni Juami Tiongson para sa Beermen.
