LAOAG CITY – Labis ang tuwa at hindi makapaniwala sa resulta ng eksaminasyon si Ms. Patricia Dennisse Balico matapos na naging Rank 9 ito sa September 2024 Licensure Examination for Teachers (Secondary level) at nakakuha ng 92.80% rating.
Ayon sa kanya, nalaman lamang niya ang resulta habang siya ay nasa trabaho sa pamamagitan ng kanyang mga kapwa tutor.
Sinabi niya na marami siyang naging sakripisyo at hinaharap na hamon upang makamit ang tagumpay tulad ng pagdududa sa sarili at pressure.
Aniya, nag-enroll siya sa isang Review Center dito sa lungsod ng Laoag habang pinagsama niya ang on-site at online review sessions.
Kaugnay nito, nagsimula ang kanyang pangarap na maging guro nang maging inspirasyon niya ang isang gurong nakilala niya na nagtuturo sa Senior High School.
Ibinahagi ni Balico na isa rin sa naging inspirasyon niya sa pagkukuha ng nasabing kurso ay dahil mahilig itong sumali sa Science Quiz Bees.
Sa kasalukuyan, plano ni Balico na ipagpatuloy ang kanyang pag-aaral at makakuha ng master’s degree at bukas din ito sa anumang oportunidad.
