Re-elected konsehal, binaril habang nagmamaneho ng jeep lulan ang mga estudyante

DIPOLOG CITY – Patay ang isang re-elected Sangguniang Bayan (SB) member matapos barilin ng hindi pa kilalang mga suspek kaninang umaga sa Barangay Piao, Sindangan sa Zamboanga del Norte.

Kinilala ang biktima na si Cicero Dalangan Gurrea, 59-anyos.

Base sa report ng mga pulis, napag-alaman na kasalukuyang nagmamaneho ng kanyang jeep ang biktimang si Gurrea at sakay ang tinatayang 10 estudyante nang bigla itong barilin ng riding-in-tandem.

Nagtamo ng tatlong tama ng bala sa dibdib ang biktima na sinubukan pang dalhin sa pinakamalapit na ospital ngunit idineklara itong dead on arrival ng doktor.

Sa ngayon ay naglunsad na ng hot pursuit operation ang mga otoridad hinggil sa posibleng pagkakaaresto ng mga responsable sa krimen.