Lumagda ang Korte Suprema sa pakikipagtulungan sa Home Development Mutual Fund (Pag-IBIG) para mabigyan ng access ang mga judiciary employees sa abot-kayang pabahay.
Ang kasunduan o memorandum of understanding ay nilagdaan ni Chief Justice Alexander Gesmundo.
Sa ilalim ng MoU, na pinasimulan ni Senior Associate Justice Marvic Leonen, ang mataas na hukuman ay nangakong ipatupad ang isang Group Sale of Real and Other Properties Acquired (ROPA) Program kung saan ito ang magpapadali at tutulong sa mga empleyado ng Korte Suprema sa pagtukoy ng kanilang gustong ari-arian mula sa listahan ng acquired assets (AAs) o home-matching sa mga available na imbentaryo ng mga accredited developer ng Pag-IBIG Fund.
Magpapalawig din ang Pag-IBIG ng mga indibidwal na housing loan sa mga kwalipikadong empleyado ng Korte Suprema, alinsunod sa umiiral nitong housing loan policy at guidelines.
Alinsunod dito, isang Collection Servicing Agreement ang itatayo sa high tribunal para sa koleksyon ng buwanang housing loan amortization ng mga empleyado nito na sumali sa group sale.
Samantala, ipinunto ni Senior Associate Justice Leonen na ang proyekto ay hindi nangangailangan ng anumang paggamit ng pondo mula sa Hudikatura at pag-avail ng mga karaniwang programa ng Pag-IBIG para sa buong gobyerno.
Binanggit din niya ang pagiging maagap ng pag-unlad na ito dahil inaasahan ng mataas na hukuman ang paglilipat sa mas madaling proseso nito sa darating na taon.
