Ang petisyon na inihain sa Korte Suprema (SC) laban sa 2025 General Appropriations Act (GAA) ay isa umanong oagtatangka na ma-destabilize ang gobyerno at maibalik ang P1.3 bilyong budget ng Office of the Vice President (OVP), na tinanggal ng Kongreso dahil sa kakulangan umano ng transparency sa paggamit ng pondo.
Kinondena ni Deputy Majority Leader Paolo Ortega ang petisyon na inihain nina Rep. Isidro Ungab, Atty. Vic Rodriguez, at kanilang mga kaalyado, na isa umanong bahagi ng mas malawak na planong pampolitika na ang layunin ay maghasik ng kawalang-katiyakan at pahinain ang administrasyon ni Pangulong Ferdinand R. Marcos Jr.
Samantala, iginiit ni Acting House Committee on Appropriations Chairperson Rep. Stella Luz Quimbo ng Lungsod ng Marikina na hindi na kinakailangan na muling ratipikasyon ng Kongreso ang naiwastong ulat ng bicameral conference committee, dahil may kasama na umano sa niratipikang bicameral conference committee report ang probisyon para sa gagawing pagbabago.
Tinawag ni Ortega, isang miyembro ng Young Guns ng House of Representatives, ang petisyon sa SC bilang isang “calculated political gambit” na layong hadlangan ang progreso ng administrasyon at guluhin ang pamahalaan.
Inakusahan niya ang mga nagpetisyon na sinusubukang baligtarin ang desisyong ginawa ng Kongreso na bawasan ng P1.3 bilyon ang badyet ng tanggapan ni Vice President Sara Duterte.
Binigyang-diin ni Ortega na ang hakbang na ito ay bahagi ng isang pattern ng politikal na pagmamanipula na naglalayong magpalaganap ng pagdududa sa pagiging lehitimo ng pambansang badyet.
Binalaan niya na ang tunay na layunin ng paghahain ng petisyon ay pahinain ang administrasyong Marcos at ihanda ang posisyon para sa konsolidasyon ng kapangyarihan ni Vice President Sara Duterte.
Tinawag niya ang ganitong mga taktika bilang “divisive and dangerous,” na binibigyang-diin na hindi lamang nito nilalagay sa panganib ang katatagan ng gobyerno kundi pati ang tiwala ng publiko sa mga institusyon ng bansa.
Hinikayat ni Ortega ang publiko na tanggihan ang naratibo ng mga nagpetisyon at kilalanin ang tunay na layunin sa likod ng hakbang na ito.
Muling pinagtibay niya ang pangako ng Kamara na ipagtanggol ang integridad ng badyet ng 2025 at tiyakin na ito ay maglilingkod sa pangangailangan ng sambayanang Pilipino.
Binigyang-diin niya na ang pamamahala ay hindi dapat maging bihag ng mga ambisyong pampolitika, na nagbabala na ang ganitong mga legal na hakbang ay nakapipinsala sa pambansang katatagan.
Tinapos niya ang kanyang pahayag sa panawagan para sa pagkakaisa at pamumuno, hinihimok ang Kongreso at ang publiko na magpatuloy at huwag madala sa mapanirang mga scheme ng politika.
