Pinagtibay ng Korte Suprema ang pagbasura ng mga reklamo sa graft laban sa yumaong business tycoon na si Roberto Ongpin at mga dating opisyal ng gobyerno kaugnay ng pagbibigay ng $20-million loan noong 1980.
Sa 16 na pahinang desisyon na ipinahayag, ibinasura ng SC First Division ang petition for certiorari na umaatake sa 2012 resolution at order ng Office of the Ombudsman na nag-dismiss sa mga kaso.
Ibinasura ng Ombudsman ang mga reklamong graft laban kay Ongpin, isang dating Trade minister, gayundin kay dating Tourism minister Jose Aspiras, dating Philippine National Bank (PNB) Senior Vice-President Gerardo Agulto Jr., at dating PNB Executive Vice-President Domingo Ingco.
Ibinasura rin nito ang mga kaso laban sa Marbella Club Manilla Incorporated (Marbella) Executive Vice President Bernardo Vergara, Marbella Vice-President Federico Salcedo, at Marbella Vice-President Merle Deen.
Nag-ugat ang kaso sa reklamong inihain ng Presidential Commission on Good Government (PCGG) laban sa mga respondent na nagsasabing noong April 1979, halos anim na buwan matapos ang Marbella ay maincorporate, inaprubahan ng subsidiary ang kahilingan ng Marbella para sa pagpapalabas ng Letter of Guarantee upang garantiyahan ang foreign credit sa pangunahing halaga na $20 milyon.
Ayon sa Presidential Commission on Good Government (PCGG), kumilos ang mga respondent nang may bad faith o inexcusable negligence.
Gayunpaman, ibinasura ng Ombudsman ang reklamo noong August 2012 dahil sa kawalan ng probable cause at tinanggihan ang mosyon para sa muling pagsasaalang-alang ng Presidential Commission on Good Government noong October 2012.
Dahil dito, naghain ng petisyon ang Presidential Commission on Good Government sa Korte Suprema laban sa Ombudsman para sa grave abuse of discretion.
Sa bahagi nito, sinabi ng Korte Suprema na kumilos ang Ombudsman alinsunod sa mandato nito at hindi gumawa ng matinding pang-aabuso sa pagpapasya.
Sinabi pa ng SC na walang nakitang patunay ang Ombudsman ng manifest partiality, evident bad faith, o gross inexcusable negligence sa bahagi ng mga respondents.
Sinabi nito na ang desisyon ng Ombudsman ay nakaangkla sa katotohanan na ang Marbella ay hindi isang kathang-isip na korporasyon.
Una na rito, si Ongpin, chairman ng Alphaland Corporation, ay namatay noong February 4, 2023 sa edad na 86.
