KORONADAL CITY – Patay ang isa umanong scout ng Dawlah Islamiyah terror group sa bayan ng Polomolok, South Cotabato sa isinagawang drug buybust operation.
Sa panayam ng Bombo Radyo Koronadal kay Polomolok PNP deputy chief of police for operations Capt. Rommel Getalia, kinilala ang suspek na si Rolando Compasion ng Prk. 2, Brgy. Rubber sa naturang bayan.
Nanlaban umano ito matapos ang drug transaction kaya napilitan ang raiding team na gumanti, dahilan na tinamaan si Compasion.
Isinugod pa ito sa ospital ngunit idineklarang dead on arrival.
Narekober sa suspek ang walong sachet ng pinaniniwalaang shabu, pistola at cellphone.
Nabatid na siya umano ang nagbibigay ng tip sa kaniyang mga kasama kung saan nakapwesto ang mga patrol vehicle ng mga pulis at kung saan naka-deploy ang mga otoridad.
