BACOLOD CITY – Nagbigay pugay ang Jakarta, Indonesia, sa Philippine Dancesports gold medalists mula Bacolod City kasabay ng mainit na pagtanggap sa kanila matapos manalo sa South East Asian (SEA) Games 2019 at inimbitahang mag-perform sa nasabing bansa.
Sa panayam ng Star FM Bacolod kay Steph Sabalo, sinabi niyang hindi nila akalain ni Angelo Marquez na mainit ang pagtanggap ng Indonesia sa kanila kung saan binigyan pa sila ng kanilang sariling show na maipakita ang kanilang galing sa dancesports.
”Nagbigay pugay po sila sa amin bilang nanalo po kami sa SEA Games po. Hindi po namin inexpect na mainit yong pagtanggap po sa amin,” kuwento ni Steph Sabalo.
Kung maaalala, nanalo ang Bacoleno couple ng dalawang gold medals sa Latin 5 dance at Paso doble at isang silver sa jive sa katatapos lang na 2019 South East Asian Games.
