ILOILO CITY- Halos hindi na nakilala pa ang isang senior citizen matapos dalawang beses na nagulungan at nakaladkad ng 10 wheeler wing van sa Barangay Culasi, Ajuy, Iloilo.
Ang biktima ay si Victor Catalan, 71 anyos at residente ng nasabing barangay.
Sa panayam ng Bombo Radyo kay PLt. Danilo Noca, hepe ng Ajuy Municipal Police Station, sinabi nito na paakyat sa elevated na bahagi ng kalsada ang wing van na minamaneho ni Jonel Catmiyo Jr. , 33 anyos, residente ng Hinigaran, Negros Occidental at papunta sa Roxas City, Capiz nang na -overheat ang sasakyan.
Sinubukan nitong kumambyo ngunit dumausdos ito at nagkataon naglalakad sa likod ng wing van ang biktima at doon na ito nagulungan ng wing van.
Ayon kay Noca, hindi napansin ng driver na may nagulungan na ito kung kayat muli itong umatras at nakaladlkad ulit ang matanda na naging dahilan ng agaran nitong pagkamatay.
Sa ngayon, nasa kustodiya na ng Ajuy Municipal Police Station ang driver ng wing van.
