Kinilala ni Speaker Martin G. Romualdez ang mahalagang papel ng mga irrigators association (IA) na itinuturing na mga “bayani ng agrikultura” sa kanilang pagpapatibay sa seguridad ng pagkain sa bansa.
Ipinahayag ni Speaker Romualdez ang buong suporta ng Kamara de Representantes sa paglikha ng mga batas upang mapabuti ang kanilang kalagayan at matugunan ang kanilang mga matagal nang suliranin.
Ginawa ni Speaker ang kaniyang pahayag sa ginanap na 2025 Nationwide NIA-IA Congress na ginanap sa Canyon Woods Resort Club sa Laurel, Batangas noong Miyerkules,
Pinangunahan ni NIA Administrator Eduardo Guillen ang pagtitipon na naglalayong palakasin ang ugnayan ng mga irrigator, ahensya ng gobyerno, at mga mambabatas.
Sa kanyang talumpati, binigyang-diin ni Speaker Romualdez ang mahalagang papel ng irigasyon sa kabuhayan ng mga magsasakang Pilipino, at direktang inuugnay ang sapat na suplay ng tubig sa seguridad sa pagkain sa buong bansa.
Tiniyak din ni Speaker Romualdez sa mga pinuno ng IA na kinikilala ng Kongreso ang kanilang pagsisikap at sakripisyo, idiniin ang kanilang mahalagang ginagampanan sa ekonomiya, lalo na sa kabila ng patuloy na hamon sa sektor ng agrikultura.
Ipinahayag din ni Speaker Romualdez na kaniyang nauunawaan ang mga problema ng mga magsasaka na narinig niya sa mga pagbisita sa komunidad.
Kabilang dito ang mga isyu sa subsidies, insurance, water permit fees,at scholarships para sa kanilang mga anak.
Nangako si Speaker Romualdez na personal niyang tututukan ang mga nakabinbing panukalang batas at ang pagbalangkas ng mga patakaran at badyet sa agrikultura, upang matiyak na maririnig ang boses ng mga magsasaka at mananatiling sentro ng mga prosesong ito.
Hinikayat din niya ang mga lider ng IAs at mga samahan ng magsasaka na makilahok sa mga talakayan at deliberasyon sa Kongreso upang matiyak na ang mga batas na ipapasa ay tunay na sumasalamin sa kanilang pangangailangan.
Pinaalalahanan ni Speaker Romualdez ang sektor ng agrikultura na huwag mag-atubiling ipahayag ang kanilang saloobin sa mga mambabatas, kasabay ng pagbibigay-diin na ang House of Representatives sa ilalim ng kanyang pamumuno ay nakatuon sa pagsasalin ng kanilang mga pangangailangan sa makabuluhang mga batas at patakaran.
