Posible umanong peke ang special protocol plate no. 8 na nakakabit sa sports utility vehicle (SUV) na sinakyan ng isang lalaki na nagbanta na babarilin ang kanyang nakaalitan sa kalsada.
Ito ang naging pahayag ni House Secretary-General Reginald “Reggie” Velasco.
Sinabi ni Velasco na mariing kinukondena ng Kamara de Representantes ang maling paggamit ng special protocol plate number “8” ng may-ari o driver ng naturang SUV.
Hinimok ni Velasco ang mga awtoridad na agad magsagawa ng imbestigasyon at papanagutin ang indibidwal na nasa video.
Ipinaliwanag ni Velasco na ang special protocol plate “8” ay eksklusibong ipinapagamit lamang sa mga kasalukuyang miyembro ng Kamara.
Hinikayat din ni Velasco ang publiko na maging mapagbantay at i-report ang mga katulad na insidente.
Sinabi ni Velasco na hindi pa naglalabas ng special “8” plates ang ang Kamara ngayong 19th Congress.
