BACOLOD CITY – Makalipas ang mahigit isang linggo, nahuli na ang suspek na gumahasa sa 13-anyos sa Cadiz City, Negros Occidental.
Ang 23-anyos na si Marlon Beboso Jr. ng Sitio Payawan, Cabiahan, Cadiz City ay nahuli sa Talisay City matapos silbihan ng mga pulis ng warrant of arrest sa ibang kaso na kanyang kinakaharap.
Sa panayam ng Bombo Radyo kay Police Major Jigger Gimeno, hepe ng Talisay City Police Station, may standing warrant of arrest si Beboso sa kasong rape na kanyang nagawa sa Barotac Viejo, Iloilo.
Kahapon, nakipag-ugnayan ang Cadiz Police Station sa Talisay matapos namataan ang suspek sa Barangay Zone 3.
Kaagad namang nagtulungan ang mga pulis at force multipliers upang bantayan ang bahay na tinutuluyan ng suspek.
Nang umalis si Beboso sakay sa tricycle upang tumakas, dito na ito hinuli ng mga pulis.
Ayon sa hepe, nagpanggap ang suspek na trisikad driver at tinatayang mga limang araw pa lang na nananatili sa Talisay City.
Ayon sa impormasyon, may ginahasa rin ang suspek sa Kabankalan City, Negros Occidental.
