Suspek sa panggagahasa patay nang manlaban umano sa mga pulis sa Sultan Kudarat

CENTRAL MINDANAO – Binawian ng buhay ang isang rape suspect nang manlaban umano sa mga pulis sa lalawigan ng Sultan Kudarat.

Nakilala ang nasawi na si Pata Ebus Makalbog, 37, vendor at residente ng Datu Piang, Maguindanao.

Ayon kay Lambayong chief of police Major Jenahmeel Toñacao na inaresto ang suspek sa Purok Mohamidan, Barangay Matiompong sa bayan ng Lambayong.

Dinala si Makalbog sa Lambayong Municipal Police Station at habang nagsasagawa ng booking procedure ay biglang nang-agaw umano ng baril sa isang pulis.

Pumutok ang baril ng pulis at tinamaan ang suspek na agad dinala sa ospital ngunit hindi na ito umabot ng buhay.