ILOILO CITY – Isa ang patay matapos bumangga ang sports utility vehicle sa kasalubong na truck sa Barangay Sambag, Zarraga, Iloilo.
Ang biktima ay si Julius Desucatab, ng Barangay Tiwi, Barotac Nuevo, Iloilo at driver ng sports utility vehicle.
Sa panayam ng Bombo Radyo Iloilo kay Police Captain Raffy Señeres, hepe ng Zarraga Municipal Police Station, sinabi nito na
wasak ang harapan ng sports utility vehicle matapos sumalpok sa elf truck sa highway.
Ayon kay Señeres, lumihis ng linya ng kalsada ang sports utility vehicle kaya sumalpok sa nakasalubong na elf truck na may kargang feeds.
Nadamay rin anya ang kotse na nasa harapan na bahagi ng sports utility vehicle kung saan nasagi niya ito.
Pumailalim naman ang isang motorsiklo na sumusunod sa likurang bahagi ng elf truck.
Nakaligtas naman ang dalawang pasahero ng sports utility vehicle na kaagad na dinala sa ospital.
