Nagkaroon muli ng sulfur dioxide degassing ang Taal Volcano nitong Huwebes.
Ayon sa Phivolcs, naranasan ito bandang alas-4:30 ng hapon, Marso 28, 2024.
May kabuuang 18,638 tonelada/araw ng volcanic sulfur dioxide o SO2 gas emission ang nai-record mula sa Taal Main Crater.
Ito na ang pinakamataas na flux na naitala ngayong taong 2024.
Ang Taal ay may average na humigit-kumulang 10,331 tonelada/araw para sa taon at patuloy na nagde-degas ng malalaking konsentrasyon ng SO2 mula noong 2021.
Napigilan naman ng katamtamang hangin ang accumulation ng SO2.
Gayunpaman, ang matagal na pagkakalantad sa volcanic SO2, lalo na ng mga komunidad sa kanluran at timog-kanluran ng Taal Volcano Island, ay maaaring magdulot ng pangangati sa mata, lalamunan at respiratory tract.
Ang mga taong pina-iiwas ay ang mga may kondisyong pangkalusugan tulad ng hika, sakit sa baga at sakit sa puso, mga matatanda, mga buntis at mga bata.
Para sa mga komunidad na maaaring maapektuhan ng SO2 ng bulkan, mangyaring alalahanin ang mga sumusunod:
(1) Limitahan ang iyong pagkakalantad. Iwasan ang mga aktibidad sa labas, manatili sa loob ng bahay at isara ang mga pinto at bintana.
(2) Protektahan ang iyong sarili. Takpan ang iyong ilong, gumamit ng N95 facemask. Uminom ng maraming tubig upang mabawasan ang anumang pangangati o paninikip ng lalamunan.
Kung kabilang sa partikular na sensitibong grupo ng mga tao, bantayan ang iyong sarili at humingi ng tulong sa isang doktor o sa barangay health unit kung kinakailangan, lalo na kung ang mga malubhang epekto ay nararanasan.
