Nabenta ang kakaibang trading card ni NBA superstar LeBron James ng tumataginting na $1.8-milyon o halos P89-milyon.
Ayon sa Golden Auctions, binura ng modern trading card ni LeBron ang naitalang record ni Los Angeles Angels star Mike Trout na umabot lang ang halaga sa $923,000 noong Mayo.
Batay sa ulat, lumikha ng 23 kopya ang Upper Deck ng nasabing card na pinirmahan ni LeBron noong rookie season nito sa Cleveland Cavaliers.
Nasa “gem mint” condition na may 9.5 grade ang card na nabili ng kolektor na si Leore Avidar.
Si LeBron, na naging 16-time All-Star at four-time Most Valuable Player, ay hinahabol ang kanyang ikaapat na NBA title at una kampeonato bilang miyembro ng Lakers.
Nasa ikatlong puwesto ngayon ang 35-year-old veteran sa kasaysayan ng liga na may 34,087 points.
