Humihirit pa rin umano si US President Donald Trump ng bonggang send off sa kanyang pag-alis sa White House upang bigyang daan ang pagpasok ng Biden administration.
Sinasabing naghahanda umano ngayon ang kanyang mga staff sa mga kukuning tao upang magbigay nang pagsaludo sa pag-alis niya sa lugar.
Lumutang naman na sa halip na sa January 19 ang White House departure ni Trump, inilipat daw ito sa umaga ng January 20, na siyang araw mismo nang panunumpa naman nina President-elect Joe Biden at Vice President-elect Kamala Harris.
Posibleng sakyan daw ni Trump ang presidential chopper na Marine One patungo ng Palm beach sa Florida.
Si First Lady Melania Trump ay nagsimula na ring mag-alsa balutan noong pang mga nakaraang linggo.
Napaulat din na mistulang nagwala at napikon pa si President Trump nang merong staff ang nag-ungkat sa nag-resign noong dekada sitenta na si dating President Richard Nixon dahil din sa mga iskandalo.
Ayaw daw kasi ni Trump na matulad kay Nixon lalo na at nakaamba na naman posibilidad na pagtibayan ng Senado ng Amerika ang pag-impeach sa kanya ng House of Representatives.
