Binisita ni Vice President Sara Duterte ang lamay ng nasawing sundalo na si Cpl. Rovic Jhun Boniao ng Philippine Army sa kanilang tahanan sa Aloran, Misamis Occidental noong nakaraang linggo.
Sa ibinahaging post ng Bise Presidente ngayong Huwebes, personal na nagpaabot ng taus-pusong pakikiramay si VP Sara sa pamilya ng nasawing sundalo.
Aniya, nasawi si Cpl. Boniao sa nangyaring engkwentro laban sa teroristang grupo na New People’s Army (NPA).
Nagpahayag din ng pagkalungkot ang Bise Presidente para sa naulilang dalawang maliliit na anak ng nasawing sundalo dahil sa isang giyera na aniya’y resulta ng baluktot na ideyolohiya ng mga NPA.
Nagpaabot din ng pasasalamat ang Bise Presidente sa pamilya ni Cpl. Boniao sa walang katumbas na serbisyo at pagmamahal nito para sa ating bayan. Gayundin nagpaabot si VP Sara ng pakikiramay sa buong Sandatahang Lakas ng Pilipinas sa pagkawala ng isang magiting na miyembro ng kanilang hanay.
