CAUAYAN CITY – Dead on Arrival sa pagamutan ang isang welder matapos mabangga ng isang courier wing van truck sa pambansang lansangan na nasasakupan ng Junction sa barangay Cabugao, Echague, Isabela.
Ang biktima ay si Jay Videz,34 anyos, may asawa, welder at residente ng Angoluan, Echague, Isabela habang ang driver ng courier wing van truck ay si Bonifacio Cabanilla, 41 anyos, may asawa, at residente ng Fuyo, Ilagan City.
Binabagtas ng van ang pambansang lansangan patungong Santiago City habang papalabas naman ang motorsiklong minamaneho ni Videz sa kanto ng Cabugao dahilan upang mabangga ang motorsiklo.
Agad namang itinakbo sa pagamutan ang biktima subalit idineklarang dead on arrival dahil sa malalang sugat na kanyang tinamo.
Sa ngayon ay nasa pangangalaga na ng Echague Police Station ang driver ng courier van habang patuloy ang pagsisiyasat ng mga awtoridad.
